(Beterriko liburua 2005) Denboraz eta patxadaz landutako 63 pieza txiki daude liburu honetan: ipuinak, poemak, gogoetak, saiakerak... Fikzioa eta kronika, biak nahastu ditu maisuki idazleak, bizitzaren bidaia luzea hobeto ulertzeko, eta bidaia horretan irakurleei gozatzen laguntzeko asmoarekin.Hain pertsonala den bere ikuspegitik idatzi ditu idazleak testu hauek, betidanik hain berezia iruditu zaigun bere sentiberatasun dotore hori erabiliz. Testu biziak dira, lerro landuak, bakarka eta banaka irakurtzekoak, baina denen artean liburuari sakontasun liluragarri bat eransten diotenak.Gauza txikiekin lan eginez idazle handia izatera iritsi da Pako Aristi azken urteotan, inork uste ez duen tokitik literatura ateratzen dakielako. Haren hainbat artikulu antologikoak bihurtu dira. Eta orri hauetako samurtasun zorrotza ere laster gogoangarri bihurtuko da irakurleen oroimenean.

Belandia mendi eta muinoz inguraturik agertzen da elizako kanpandorretik. Txuri-berdea da udaberrian, horixka eta urdinxka udan, gorria udazkenean eta beltza neguan. Ordea, kolorerik ez du behin ere aldatzen Martinellok: mutiko argia da beti. Simonet Leroix herriko organista du lagun eta kontu eta kanta ematen dute eguna. Heriotzak ere egingo du bisita Belandiara, eta Martinelloren osaba eramango du. Hurrena, Trapatan zirkoa azalduko da herrira. Ohi ez bezalako gertakaria da hori eta erabat aztoratuko du Martinello...

Larunbata da eta Mertxe Pandeletxek eta Mari Bexamelek ez dute eskolara joan beharrik. Donostiara joateko egun aproposa, inondik ere! Hiriburu polita da Donostia eta denetarik dago bertan. Adibidez, Mertxe Pandeletxek pijama txinarra nahiko luke. Donostiara iritsi eta laster konturatu dira han ez dagoela denda txinarrik. Dendarik ez, baina jantokia bai: Taiwan Jantoki Txinoa. Bertara sartu dira. Han, kantari ezaguna ikusi dute, jaten: Txomin Artola. Negar hotsa ere aditu dute. Suen Lhy da, neska txinarra, negar eta negar. Izan ere, Txinako likor ospetsua egiteko Lerdo Burutsuk hil nahi dituen muskerrak salbatu nahi ditu Suen Lhyk. Baina ezin du. Mertxe Pandeletxek eta Mari Bexamelek lagunduta, beharbada...

Gauero ateratzen da kalera eta lagunekin galdutako minutu eta orduetan ikasi du ez dakiela bizitza zer-nolakoa den bertan buru-belarri sartuzale ez denak. Eskarmentu handia du, begia beti erne; inguruan gertatzen den-dena jaso eta, bere buruaren labirintuan jira eta bueltaka ibili ondoren, guri eskaintzen digu. Ipuin hauetan ez du irakurleak aurkituko bizitzari buruzko teoria handinahi bezain arrotzik, gizon-emakumeen arteko harremanei emandako begirada ironiko eta lagunkoia baizik, gizon-emakumeenganako ternezia neurrigabea, azken finean. Liburuko testuek erakusten dute, beste ezerk baino hobeto, zaila dela zoriontsu izatea, baina merezi duela, kosta ahala kosta, horretan saiatzea.Felipe Juaristi

Martinello eta sei piratak istorioaren jarraipena da liburu hau. Sevillarrak joan dira Belandiatik, Teresak adio egin dio Martinellori eta, honenbestean, amaitu da uda. Hala ere, irailaren erdi aldean hasiko dira eskolak eta bidaia egitea erabaki dute Martinellok eta lagunek. Baltsa bat egitea pentsatu dute, nora joan ez badakite ere. Txatarreriara joango dira lehenengo, baltsa egiteko behar dituzten gauza guztien bila...